အလွမ်းပြေ

တစ်နေ့  တစ်နေ့... စာမျက်နှာ စာအုပ်ကြီးပေါ်က သတင်းတွေ ဖတ်လိုက်၊ သတင်းလင့်တွေ အောက်က  ရန်ပွဲ အဲလေ ဘွာတေး ၊ ဝက်ဝက်ကွဲ ဆွေးနွေးပွဲ တွေကို မျက်လုံးလေး ပေကလပ် ပေကလပ်နဲ့ တက်ဖတ်လိုက်နဲ့ မိန်းကလေးဆိုတော့ စပ်စုတာပေါ့။

အဲလိုနဲ့ ဥာဏ်မီသလောက်လေး ပြေးပြေး ဖတ်ရင်း  ... ငြိမ်းချမ်းရေး ကိစ္စ ဟိုကိစ္စ ဒီကိစ္စတွေ ရိပ်မိဝါးမိလားတော့ .. ငြိမ်းချမ်းရေး ကိစ္စ တွေ ပြောကြတာတွေ့ရင် အရိုးရဲ့ ဥ... သီချင်းကိုပဲ ပြေးပြေး သတိရမိပါတော့တယ်။

ပြည်တွင်းစစ်တွေ အကြောင်း ၊ စဖြစ်ရတဲ့ အကြောင်းတွေ ထားလိုက်ပါဦး...  အခု လက်ရှိ ကြုံနေရတဲ့ အရာလေးတွေပဲ ကြည့်ပါရစေဦး။

စစ်ပွဲကြောင့်..

မိဘမဲ့ရတဲ့ ကလေးတွေ၊ ကွဲကွာရတဲ့ မိသားစုတွေ၊ နေစရာမဲ့ ဖြစ်နေတဲ့ လူသားတွေ၊ ကျီးလန့် စာစားဘဝတွေ .. ချစ်သောသူနဲ့ ကွေကွင်းရတဲ့ အပူမီးတွေ၊ မျက်ရည်တွေ .. 

စစ်ပွဲတွေ ဘာကြောင့် စပြီး တိုက်တိုက် .. စတိုက်ရင်းနဲ့ နောက်ဆက်တွဲ ရလာတာက အမုန်းတွေ အငြိုးတွေ ပါပဲ.. သက်တမ်းကြာလေ နှစ်ဘက်စလုံးက အငြိုးတွေ အမုန်းတွေ ပိုပိုကြီးလာလေပါပဲ။ 

အရိုးရဲ့ သီချင်းထဲမှာလိုပေါ့.. 

သီချင်းရေး ဆရာကိုအရိုးက သူ့သီချင်းလေး ထဲမှာပဍိပက္ခ(Conflict) တစ်ခုရဲ့ သဘောသဘာဝကို အရိုးအရှင်းဆုံး ရှင်းပြထားတာပါ။ ပြဿနာရဲ့ အစကတော့ ကြက်ဥလုတာပါပဲ။ ဒါပေမယ့်  တကယ့် နောက်ပိုင်းမှာ ကိုယ့်လူထိတော့ ကိုယ်ဘက်ကနာ၊ သူလူထိတော့ သူ့ဘက်ကနာ။ တဖြည်းဖြည်း ချေလွန် လက်လွန်တွေ  ပိုပို ဖြစ်လာရာက နှစ်ဘက်လုံး အထိနာလာရတဲ့ သဘောနဲ့ နောက်ဆုံး ပြဿနာ အစဖြစ်တဲ့ ကြက်ဥ ပြဿနာကို ဖြေရှင်းဖို့ အဓိကထက် အမုန်းတရား အငြိုးတရားတွေက ပိုသိပ်သည်းလာပြီး ရှင်းဖို့ ခက်သထက် ခက်လာတတ်တဲ့ အကြောင်းကို ရေးပြထားတာပါ။ 

ကျွန်မတို့ မြန်မာ နိုင်ငံကြီးလည်း ပြည်တွင်းစစ် ဒဏ်ကို နှစ်ပေါင်းများစွာ ခါးစည်းပြီး ခံခဲ့ကြရတာပါပဲ။ ကျွန်မက သူငယ်ချင်း များပါတယ်။ တိုင်းရင်းသားလည်း စုံပါတယ်။ သူတို့တွေနဲ့ စကားပြောတဲ့ အခါတိုင်း သူတို့ ခံစားချက်တွေ သူတို့ ရင်ဘတ်နဲ့ ရင်းပြီး ခံစားရသမျှတွေကို သူတို့နဲ့အတူ မျက်ရည်လိုက်ကျပြီး ခံစား နားထောင်ပေးဖူးပါတယ်။ သူတို့ ခံစားချက်တွေကိုလည်း ထပ်တူ နားလည် ခံစားမိပါတယ်။ 

ထို့အတူ စစ်တပ်မှာလည်း သူငယ်ချင်းတွေ ရှိတော့ ရှေ့တန်းအကြောင်း သူတို့ ပြောတဲ့ အသံနဲ့ သူတို့ ပြောတဲ့ ခံစားချက်တွေကိုလည်း နားထောင်ပေးဖူးပါတယ်။ အဲဒီလိုပဲ တွေ့မြင်နေရတဲ့  စစ်ပြေး ဒုက္ခသည်တွေရဲ့ ဒုက္ခတွေကိုလည်း ခံစားမိပါတယ်။

ကျွန်မ ခေါင်းထဲမှာ တွေးမိတာကတော့  အားလုံးက ကျွန်မတို့ မြန်မာပြည်သူ ပြည်သားတွေပဲ။ သူတို့တွေ အားလုံး အနာဂတ်မှာ ဒါမျိုးတွေ ဆက် မကြုံစေချင်တော့ဘူး... စစ်ပွဲတွေရဲ့ ရလဒ်က နောက်ဆုံး ရလိုက်တာနဲ့ ပေးလိုက်ရတဲ့ အရင်းအနှီးက တန်လို့လား။ တစ်ယောက်စီတိုင်းကို လိုက်မေးကြည့်ရင် သူတို့ရော သူတို့ အနာဂတ် မျိုးဆက်တွေကို ဒီလို အခြေအနေမျိုးတွေ လက်ဆင့်ကမ်း ချင်မှာတဲ့လား။

လူတွေဟာ တစ်ချိန်ချိန်မှာ ကမ္ဘာပေါ်က တစ်နည်းနည်းနဲ့ ခွဲခွာရမယ့် သူတွေချည်းပါပဲ...အငြိုးတွေ အမုန်းတွေနဲ့ အချိန်ဖြုန်းနေမယ့် အစား လူ့ဘဝ တွေ့ဆုံစဉ် ခဏမှာ တစ်ယောက်ကို တစ်ယောက် စိတ်ချမ်းသာမှုနဲ့ မေတ္တာပေး ချစ်ခင်နိုင်ရင် ဘဝက ငြိမ်းချမ်းပျော်ရွှင်နေမှာပါ။ လက်ရှိအချိန်ကိုသာ အကောင်းဆုံး ဖြစ်အောင် နေသွားရင် နောင်တဆိုတာ မလိုတဲ့ အရာ... တစ်ယောက်ချင်းစီကနေ တစ်ကမ္ဘာလုံး ဒီအတိုင်း ပါပဲလို့ တွေးမိတယ်...။ 

အနာဂတ်မှာလည်း ကိုယ့်မျိုးဆက်ကို ကောင်းမွန်တဲ့ အခြေအနေလေး တစ်ခုကို လက်ဆင့် ကမ်းနိုင်ဖို့  အရေးအကြီးဆုံး အချက်မဟုတ်လား။ ဆွေးနွေးဖို့ လိုအပ်တဲ့ အရာတွေကို ငြိမ်းချမ်းရေး နည်းနဲ့ စည်းနဲ့ ဘောင်ထဲက တောင်းဆို ညှိနှိုင်းနိုင်ဖို့ ကြိုးစားရင်း အမုန်းတွေ အငြိုးတွေကြား နစ်မြှုပ်မနေဘဲ အကောင်းဆုံး အခြေအနေတစ်ခုကို ရုန်းထွက် ဖန်တီး နိုင်ဖို့ ကြိုးစားရမယ်လို့ ထင်မိပါတယ်။ အဖြေမထွက်တဲ့ ပုစ္ဆာတစ်ခုကို အဖြေထွက်အောင် တွက်နည်း အမျိုးမျိုး ပြောင်းတွက်ပေးဖို့ လိုအပ်တယ် မဟုတ်လား။ 

ပဍိပက္ခ ပြဿနာတစ်ခု ဖြစ်လာရင် လွယ်လွယ်နဲ့ အဆုံးသတ်ဖို့ မလွယ်မှန်းတော့ အများသူငါလိုပဲ ကျွန်မလည်း သိပါတယ်။ ဒါပေမယ့် ကျွန်မ ကချင်ဘက်က ဒုက္ခသည်တွေကို မကြည့်ရက်တော့ဘူး..  အရိုးသီချင်းထဲကလို နောက်ဆုံးမှာ ပုခုံးထဖက်စေချင် လှပါပြီ။ 

   ပြဿနာထဲကနေ အပြင်ကို ခေါင်းပြူကြည့်ပြီး ကိုယ့်လူတွေရဲ့ ခံစားနေရတဲ့ ဒုက္ခတွေနဲ့ နောက်ကျ ကျန်နေခဲ့တဲ့ တိုင်းပြည်ရဲ့ ရှေ့ရေးကို ငဲ့ပြီး ငြိမ်းချမ်းရေး ပန်းခင်းကြီးကို စတင်ပျိုးထောင်ဖို့ ပြည်သူတစ်ယောက်အနေနဲ့ ပဍိပက္ခ ပြဿနာတွေထဲက ပါဝင်နေတဲ့  Actors တွေအားလုံးကို   မျှော်လင့် တောင်းဆိုချင်မိ ပါတယ်လို့..  ငြိမ်းချမ်းရေး ဆိုတာ ရလာရင်တောင် နောက်တစ်ခါ ကြက်တွေ မဥအောင် လုပ်ရဦးမယ် မဟုတ်ပါလား။

အလွမ်းပြေ

.