Popular Posts
Subscribe To
Posts
Comments
Thursday, July 12, 2012
ဒီမိုကရေစီ အုတ်မြစ်အတွက် ဖတ်သင့်တဲ့ စာအုပ်လေး
ကျွန်မ ဆက်တိုက် အလုပ်ရှုပ် ပင်ပန်းသွားတာရယ်၊
ခရီး ထွက်ရကာနီးရယ်ကြောင့် စောစော အနားမယ်လို့ စိတ်ကူးပြီး အိပ်ယာဝင်ပေမယ့် စိတ်က သူငယ်ချင်းဆီက
လက်ဆောင်ရလာတဲ့ စာအုပ်လေးဆီ ရောက်နေတာကြောင့်
အိပ်မရဘဲ စာထဖတ်မိပြန်ပါတယ်။ တူဒေး
စာအုပ်တိုက်က ထုတ်တဲ့ ‘ ပညာရေးအစ … ဒီမိုကရေစီ အခြေခံ” ဆိုပြီး ဆရာ ဒေါက်တာ သိန်းလွင်က
“ Education and The Culture of Democracy
: Early Child Hood Practice” ဆိုတဲ့ စာအုပ်ကို ဘာသာပြန်ထားတဲ့ စာအုပ်ပါ။
ဒီမိုကရေစီ စနစ်ရဲ့ အနှစ်သာရနဲ့ အလေ့အထ
များကို ရှင်းလင်းထားပြီး ဒီလို ဒီမိုကရေစီ စနစ်ကို ပုံဖော်ရမှာ အရေးကြီးတဲ့ ဇာတ်ကောင်တွေအနေနဲ့
ကလေးများဟာ ဘယ်လောက်အထိ အရေးပါတယ်ဆိုတာကို ရှင်းပြထားပါတယ်။ နောက်ပြီး ကလေးများရဲ့
ပတ်ဝန်းကျင် ၊ အထူးသဖြင့် ကျောင်းနဲ့ မိသားစု ဝန်းကျင်ဟာ ကလေးတွေအပေါ် လွမ်းမိုးမှု
ဘယ်လောက်ရှိတယ် ဆိုတာနဲ့ ဒီကလေးတွေဆီ ဒီမိုကရေစီစနစ် အမြစ်တွယ် သွားမှသာ နိုင်ငံသားကောင်းတစ်ယောက်
အဖြစ် ဘယ်လို ရပ်တည်နိုင်မယ် ဆိုတာကိုလည်း စိတ်ဝင်စားစရာ ရေးပြထားပါတယ်။ ကလေးတွေကို
မွေးထုတ်ပုံဖော်ရာ ကလေးတို့ရဲ့ ကြီးပြင်းရာ ပတ်ဝန်းကျင် အထူးသဖြင့် စာသင်ကျောင်းများနှင့်
မိသားစု ဝန်းကျင် ၊ မိဘနဲ့ ဆရာ များဟာ အရေးပါတဲ့ သူများ ဖြစ်တယ် ဆိုတာကို ထောက်ပြထားပါတယ်။
ဒီနောက်မှာတော့ ကလေးတွေကို ဒီမိုကရေစနစ်နဲ့ ရင်းနှီးအောင်၊ ဒီမိုကရေစီ စနစ်ရဲ့ နိုင်ငံသားကောင်းများရဲ့
လူ့အဖွဲ့အစည်းအဖြစ် ထိထိရောက်ရောက် ပါဝင်တဲ့ သူများ ဖြစ်လာအောင် လိုအပ်တဲ့ အသိ အမြင်နဲ့
ကျွမ်းကျင်မှုတွေ ရအောင် ငယ်စဉ်ကတည်းက ကျောင်းမှာနဲ့ အိမ်မှာ ဘယ်လို ပြုမူ သင်ကြားပေးရမယ်
ဆိုတာတွေကို သေသေချာချာ ရေးသားဆွေးနွေး ဖော်ပြထားပါတယ်။
ကျွန်မ သူငယ်ချင်းက ကျွန်မကို ဒီစာအုပ်ကလေးကို
ပေးရင်း ပြောတဲ့ စကားအတိုင်း ဒီစာအုပ်ကလေးက အသိပညာတင်မက ဘယ်လို အသုံးချရမယ် ဆိုတဲ့
အတတ်ပညာကိုပါ ပေးထားတာကို ထူးခြားကောင်းမွန်တဲ့ အချက်အနေနဲ့ တွေ့ရပါတယ်။ ဒီမိုကရေစီ
စနစ်ကို မြတ်နိုးသူတိုင်း လိုချင်ပါတယ်လို့ ပြောနေမယ့်အစား ကိုယ်တိုင် ဘယ်လို ကြိုးစား
ရယူနိုင်မလဲ။ အနာဂတ် အပြောင်းအလဲကို ဘယ်လို ပုံဖော်မလဲ ဆိုတာကို ဒီစာအုပ်ကလေးက လမ်းညွှန်ထားတာပါပဲ။
ကျွန်မတို့ မြန်မာနိုင်ငံရဲ့ ဒီမိုကရေစီ
သားပေါက်ကလေး ဆက်လက်ရှင်သန်ပြီး ရင့်ကျက်တဲ့ စနစ်အဖြစ် အနာဂတ်မှာ ပုံပေါ်လာဖို့ဆိုရင်
ကလေးငယ်တွေဆီမှာ ဒီမိုကရေစီ အုတ်မြစ်ကို ခိုင်အောင် ချရမယ်ဆိုတာကို အတိအလင်း မီးမောင်းထိုးပြနေပါတယ်။
တခြားသူတွေကိုလည်း ဖတ်ကြည့်ဖို့ ညွှန်းချင်တဲ့ စိတ်ရယ်ကြောင့် ဖတ်ပြီးပြီးချင်း ဒီစာအုပ်
အညွှန်း ပို့စ်လေးကို ထရေးမိတာပါပဲ။ ‘ ပညာရေးအစ … ဒီမိုကရေစီ အခြေခံ” ဆိုတဲ့ စာအုပ်လေးကို
ကလေးတွေနဲ့ နီးစပ်နေတဲ့ ကျွန်မတို့ တွေ ဒီမိုကရေစနစ်ကို တကယ်လိုလားတယ်ဆို ဖတ်သင့်တဲ့
စာအုပ်ကလေးပါပဲလို့ ညွှန်းချင်ပါတယ်။ ဒီစာအုပ်ကို လက်ဆောင်ပေးလာတဲ့ သူငယ်ချင်း ကိုလည်း တကယ့်ကို ကျေးဇူးတင်ပါတယ်လို့ …
ခင်မင်စွာဖြင့်
အလွမ်းပြေ
Subscribe to:
Post Comments (Atom)
0 comments: